హైదరాబాద్ నందు (బంజర హిల్స్, జూబిలీ హిల్స్, మాదాపూర్, కొండాపూర్ ) పరిసర ప్రాంతాల్లో పనిచేయుటకు సెక్యూరిటీ గార్డ్స్ వెంటనే కావాలను. ఆర్మీ మరియు పోలీస్ డిపార్ట్మెంట్ లో పని చేసి రిటైర్ అయినా వారికీ తగిన ప్రాధాన్యత ఇవ్వ బడును. మీరు సంప్రదించవలసిన ఫోన్ నెంబర్ + 91 8074965869

Category Archives: Uncategorized

దిల్ రాజు ఈజ్ సేఫ్

Category : Uncategorized

ఈ సంక్రాంతికి చాలారోజుల తర్వాత సూపర్ హిట్ అందుకున్న వెంకటేష్.. చాలా ఆశలు పెట్టుకొన్న “అంతరిక్షం” ఫ్లాపైన తర్వాత మంచి హిట్ కొట్టిన వరుణ్ తేజ్ ల కంటే ఈ సంక్రాంతికి చాలా హ్యాపీగా ఉన్న ఏకైక వ్యక్తి దిల్ రాజు. గతేడాది భారీ స్థాయిలో నష్టపోయిన దిల్ రాజు ఈ ఏడాది ప్రారంభంలోనే నిర్మాతగా మాత్రమే కాక డిస్ట్రిబ్యూటర్ గానూ సూపర్ హిట్స్ సొంతం చేసుకొన్నాడు. దిల్ రాజు నిర్మించిన ఎఫ్2 ఆల్రెడీ హౌస్ ఫుల్ కలెక్షన్స్ తో నడుస్తుండగా.. డిజాస్టర్ టాక్ తెచ్చుకున్నప్పటికీ నైజాం ఏరియాలో హౌస్ ఫుల్స్ తో నడుస్తోంది వినయ విధేయ రామ. ఈ రెండు సినిమాలు దిల్ రాజుకి కాసుల వర్షం కురిపిస్తున్నాయి. సో, దిల్ రాజు ఆల్రెడీ సేఫ్ జోన్ లో ఉన్నట్లే.  

ఈ ఏడాది చాలా జాగ్రత్తగా ప్లాన్ చేసుకొన్నాడు దిల్ రాజు. మహేష్ బాబుతో మహర్షి చిత్రాన్ని నిర్మిస్తున్న దిల్ రాజు ఈ ఏడాది తనకు బాగా ఆచ్చొచ్చిన చిన్న సినిమాలపై దృష్టి సారించాడు. కాన్సెప్ట్ బేస్డ్ సినిమాలు తీయడానికి రెడీ అవుతున్నాడు. ఆల్రెడీ రెండు సినిమాలు ప్రొడక్షన్ లో ఉన్నాయి. 

చూస్తుంటే.. గతేడాది పోగొట్టుకున్న మొత్తాన్ని కూడా ఈ ఏడాది తిరిగి రాబట్టుకొనేలా ఉన్నాడు దిల్ రాజు. ఎక్కడ పోగొట్టుకొన్నదాన్ని అక్కడే సంపాదించుకోవడం అంటే ఇదేనేమో. దిల్ రాజు ఈ సక్సెస్ స్ట్రీక్ ను ఇలాగే కంటిన్యూ చేయాలని కోరుకొందాం. 


ఏ ఎండకా గొడుగు పట్టే నిర్మాత ఈయనే!

Category : Uncategorized

మనషికి ప్రతి విషయంలోనూ ఓ స్థిరాభిప్రాయం ఉండాలి. ఎన్ని అడ్డంకులు వచ్చినా తాను నమ్మిన సిద్దాంతానికే కట్టుబడి ఉండాలి. అంతేగానీ క్షణానికో, సినిమాకో విధంగా ప్రవర్తించే వారిని మాత్రం ఊసరవిల్లులు అనే చెప్పాలి. ఇక మన నిర్మాత, దర్శకులు, హీరోల విషయానికి వస్తే వారికి ఇటీవల మీడియాలో వచ్చిన విప్లవాత్మకమైన మార్పులు జీర్ణం కావడం లేదు. ఒకప్పుడు మీడియా చాలా పరిమితంగా ఉన్న రోజుల్లో ఫ్లాప్‌ అయిన చిత్రాలు కూడా శతదినోత్సవం జరుపుకున్నాయని, ఇన్నిసెంటర్లలో విడుదలైన ఏకైక చిత్రం తమదేనని, ఇష్టం వచ్చిన కలెక్షన్ల లెక్కలు ప్రకటించేవారు.

మీడియా కూడా నేడు తప్పుదారిలో పయనిస్తోందనేది నిజమే. కానీ ఎవరో ఒకరిద్దరు ఇలా చేసినంత మాత్రాన మీడియా అంతటిని అదే గాటన కట్టడం సరికాదు. ఇక సినిమా రివ్యూలు, రేటింగ్‌ల విషయంలో మన పరిశ్రమలోని 99శాతం మంది కంటగింపుగానే ఉన్నారు. ఎప్పుడు సమయం వస్తుందా? మీడియని ఏకి పారేద్దామా? అని కోటి కళ్లతో ఎదురుచూస్తుంటారు. సినిమా బాగాలేదని రివ్యూ ఇస్తే మండిపడే వీరే.. తమ చిత్రానికి మంచి రివ్యూలు, రేటింగ్స్‌ ఇస్తే మాత్రం ఫలానా పత్రిక ఇంత రేటింగ్‌ ఇచ్చింది.

ఫలానా వెబ్‌సైట్‌ ఇంతలా తమ చిత్రాన్ని పొగిడిందని చంకలు గుద్దుకుంటూ ఉంటారు. ఇక మరికొందరు మీడియా రివ్యూలను ప్రేక్షకులు పట్టించుకోరని సెలవిస్తూ ఉంటారు. అలాంటప్పుడు అసలు మీడియా రేటింగ్స్‌ని పట్టించుకోవాల్సిన అవసరం ఏముంది? మొదటి రోజే కాకుండా ఓ వారం పదిరోజుల తర్వాత రివ్యూలు ఇవ్వాలనే డిమాండ్‌ కూడా చేస్తుంటారు. ఇక విషయానికి వస్తే ఇలాంటి వారిలో అగ్రస్థానం దిల్‌రాజ్‌కే దక్కుతుంది. ఆయన డిజె రివ్యూలపై ఏ విధంగా విరుచుకుపడ్డాడో తెలిసిందే.

ఇక సునీల్‌తో తాను నిర్మించిన కృష్ణాష్టమి చిత్రానికి మీడియా రివ్యూలు ఇవ్వాల్సిన పనిలేదని, ఆ చిత్రానికి తానే రివ్యూ, రేటింగ్స్‌ఇచ్చుకున్నాడు. కానీ దాని ఫలితం తెలిసిందే. ఇక గత ఏడాది ఆయనకు లవర్‌, శ్రీనివాసకళ్యాణం, హలో గురు ప్రేమకోసమే చిత్రాలతో వరుస ఫ్లాప్‌లు వచ్చాయి. కానీ తాజాగా విడుదలైన ఎఫ్‌2 కి మీడియా మంచి రివ్యూలు, రేటింగ్స్‌ ఇచ్చి సంక్రాంతి విజేత ఈ చిత్రమే అని చెబుతోంది. దాంతో బాగా ఖుషీ అయిన దిల్‌రాజు మీడియా అద్భుతం, మాకెంతో సపోర్ట్‌ చేస్తోందని తన రెండు నాల్కల ధోరణిని ప్రదర్శిస్తున్నాడు. 


మెగా కాంపౌండ్‌.. మరీ ముఖ్యంగా చిరు ఏం చేస్తున్నాడు!

Category : Uncategorized

వారసత్వ హీరోలకు చాలా ప్లస్‌ పాయింట్స్‌ ఉంటాయి. వరుసగా రెండు మూడు చిత్రాలు ఫ్లాప్‌ అయినా సినిమా చేసేందుకు దర్శకనిర్మాతలు రెడీగా ఉంటారు. పైగా వారసత్వంగా మొదటి చిత్రం నుంచే అభిమానుల ఫాలోయింగ్‌ ఉంటుంది. ఇక అనుభవం ఉన్న వారి సలహాలు, కనుసన్నలో మంచి చిత్రాల ఎంపిక కొనసాగుతుంది. ఈ వారసత్వ ప్లస్‌ పాయింట్స్‌ అన్నీ మెగాస్టార్‌ తనయుడు మెగాపవర్‌స్టార్‌ రామ్‌చరణ్‌కి బాగా కలిసి వచ్చాయి. చిరుత తో ఓకే అనిపించుకుని కమర్షియల్‌గా ఫర్వాలేదనిపించుకున్న ఆయన అల్లుఅరవింద్‌ నిర్మాణంలో రెండో చిత్రమే రాజమౌళితో మగధీర చేసి ఇండస్ట్రీ రికార్డులను బద్దలు కొట్టాడు.

ఆ తర్వాత ఒకే తరహా మూస కథలతో వస్తూ వచ్చినా రచ్చ, ఎవడు, నాయక్‌ ఇలా సేఫ్‌ ప్రాజెక్ట్‌ చేశాడు. కానీ ఈయన కెరీర్‌లో జంజీర్‌(తుఫాన్‌), ఆరెంజ్‌, బ్రూస్‌లీ వంటి డిజాస్టర్స్‌ వచ్చి చేరాయి. వీటితో పాటు గోవిందుడు అందరి వాడేలే వంటి చిత్రాల ఎంపిక వెనక కూడా అల్లుఅరవింద్‌, చిరంజీవి ఉన్నారు. ఆ తర్వాత రామ్‌చరణ్‌ కాస్త రూట్‌ మార్చి కొత్తదనంతో నిండిన దృవ, రంగస్థలం చిత్రాలు చేసి తనలోని నటుడిని పూర్తిగా ఆవిష్కరించాడు. కానీ మరీ ముఖ్యంగా రంగస్థలం చిత్రం సమయంలో అలాంటి పాత్రను, డీగ్లామర్‌ రోల్‌ని చేయవద్దని చిరు వారించినట్లు వార్తలు వచ్చాయి.

కానీ చరణ్‌ మాత్రం పట్టుదలతో, సుక్కు మీద ఉన్న నమ్మకంతో ఆ చిత్రం చేశాడు. ఈ చిత్రం షూటింగ్‌ పూర్తయిన తర్వాత చిరు దీనినిపూర్తిగా చూసి మెచ్చుకున్నాడు. ముఖ్యంగా ఈ చిత్రం వేడుకలో ఆయన ఆది పినిశెట్టి మరణించినప్పుడు చరణ్‌ నటన అద్భుతమని ఉదాహరణతో కూడా వెల్లడించాడు. అయితే చిరు మదిలో మాత్రం రంగస్థలం విజయంపై పెద్దగా నమ్మకం లేదనే అంటారు. కానీ అది నాన్‌ బాహుబలి రికార్డులను తిరగరాసింది.మాస్‌, యాక్షన్‌ హీరో అయిన రామ్‌చరణ్‌కి రంగస్థలం ఏమాత్రం షాక్‌ ఇచ్చినా వెంటనే ఫుల్‌ అవుట్‌ అవుట్‌ మాస్‌తో చిత్రం తీసి చరణ్‌ ఇమేజ్‌ని కాపాడాలనే ఉద్దేశ్యంతోనే చిరు వినయ విధేయ రామ తో బోయపాటికి గ్రీన్‌సిగ్నల్‌ ఇచ్చాడట.

ఇక ఈ చిత్రం మెయిన్‌ పాయింట్‌ మాత్రమే బోయపాటి చిరు, చరణ్‌లకి వినిపించాడని, కానీ కథా విస్తరణ, స్క్రిప్ట్‌ డెవలప్‌మెంట్‌ సమయంలోనే అతిశయోక్తితో నిండిన యాక్షన్‌ సీన్స్‌, రాంబో లుక్‌లో ఖైదీ గెటప్‌గా చరణ్‌ని చూపించాలనేది కూడా బోయపాటి సొంత నిర్ణయమే అని తెలుస్తోంది. ఇక వినయ విధేయ రామ వేడుకలో చిరంజీవి ఏదో ట్రైలర్‌, రెండు మూడు యాక్షన్‌ సీన్స్‌ చూసి మాత్రమే వేదికపై చరణ్‌ని, బోయపాటిని ఆకాశానికి ఎత్తేసినట్లు కనిపిస్తోంది. మొత్తానికి కథల ఎంపికలో చిరు, మెగా కాంపౌండ్‌ సలహాలు పక్కనపెట్టి చరణ్‌ తాను భావిస్తున్న విభిన్న చిత్రాలతో ముందుకు వస్తేనే బెటర్‌ అని చెప్పాలి. 


చైతు కూడా బ్యాట్‌ పట్టాడు

Category : Uncategorized

మనకి తెలిసినంత వరకు తెలుగులో వచ్చిన అశ్వనీ చిత్రం పూర్తిగా పరుగుల రాణి అశ్వనీనాచప్ప జీవితంపై వచ్చిన బయోపిక్‌. స్వయంగా అశ్వనీనాచప్పే నటించిన ఈ చిత్రాన్ని రామోజీరావు నిర్మించగా మౌళి దర్శకత్వం వహించాడు. ఇందులో కీలకపాత్రలో భానుచందర్‌ నటించాడు. అయితే ఇందులో సినిమాటిక్‌ అంశాలకు, కేవలం సినిమా కోసం చేసిన మార్పులు చేర్పులు బాగానే ఉంటాయి. ఈమద్య కాలంలో ప్రకాష్‌రాజ్‌ ధోని, సుమంత్‌ గోల్కోండ హైస్కూల్‌ వంటి చిత్రాలు వచ్చినా పెద్దగా ఆకట్టుకోలేదు.

ఇక తాజాగా నాని క్రికెటర్‌గా కనిపించనున్న జెర్సీ చిత్రం క్రికెట్‌ బ్యాక్‌డ్రాప్‌లో రూపొందుతోంది. మరోవైపు సందీప్‌కిషన్‌ క్రీడానేపధ్యం ఉన్న చిత్రం చేయనున్నాడు. ఇక విషయానికి వస్తే అక్కినేని నాగచైతన్యకి కొంత కాలంగా బ్యాడ్‌టైం నడుస్తోంది. ఆయన సమంతతో వివాహానికి ముందు పలు చిత్రాలలో నటించినా పెళ్లయిన తర్వాత చైతు-సామ్‌లు తెరపై కూడా భార్యాభర్తలుగా నటిస్తున్న చిత్రం మజిలి. నాని నిన్నుకోరి ఫేమ్‌ శివనిర్వాణ దీనికి దర్శకత్వం వహిస్తున్నాడు. 

ఈ మూవీలోని నాగచైతన్య ఫస్ట్‌లుక్‌ని న్యూఇయర్‌ కానుకగా విడుదల చేశారు. ఇందులో గడ్డం పెంచుకున్న చైతు మిడిల్‌క్లాస్‌ కుర్రాడిగా కనిపిస్తున్నాడు. తాజాగా సంక్రాంతి కానుకగా ఈ చిత్రం నుంచి సెకండ్‌పోస్టర్‌ విడుదలైంది.ఇందులో సినిమా రిలీజ్‌ డేట్‌ని కూడా ఏప్రిల్‌5 అంటూ కన్ఫార్మ్‌ చేశారు. ఇందులో నాగచైతన్య మొదటి పోస్టర్‌లోని లుక్‌కి పూర్తిడిఫరెంట్‌గా క్లీన్‌షేవ్‌తో, గ్లౌవ్స్‌, వైట్‌ అండ్‌ వైట్‌ డ్రస్స్‌లో క్రికెట్‌ బ్యాట్‌ పట్టుకుని చేతులను పైకెత్తి ఉన్నాడు. రెండో హీరోయిన్‌ దివ్యాన్షుతో రొమాంటిక్‌ మూడ్‌లో ఉన్నాడు. బ్యాగ్రౌండ్‌లో కూడా క్రికెట్‌ ఫీల్డ్‌, ప్లేయర్స్‌ ఉన్నారు. దీనితో ఈ మూవీ కథాంశం ఏమిటా? అనే ఆసక్తి కలుగుతోంది. 


వినయ విధేయ రామను నిలబెట్టాల్సింది వాళ్ళే !

Category : Uncategorized

వరల్డ్ వైడ్ గా ప్రేక్షకుల ముందుకు వచ్చిన రామ్ చరణ్ వినయ విధేయ రామ సినిమా మిక్స్డ్ టాక్ తో థియేటర్స్ లో సందడి చేస్తుంది. రామ్ చరణ్ – కైరా అద్వానీ జంటగా బోయపాటి తెరకెక్కించిన ఈ సినిమా కేవలం మాస్ ప్రేక్షకులను అలరించేదిగా.. మెగా ఫ్యాన్స్ ని ఆకట్టుకునేలా ఉందని ప్రేక్షకులతో పాటుగా రివ్యూ రైటర్స్ కూడా తీర్పునిచ్చారు. రామ్ చరణ్ మాస్ అండ్ యాక్షన్ సీక్వెన్సెస్ తప్ప సినిమాలో ఏం లేవని.. బోయపాటి యాక్షన్ మరీ ఎక్కువైందని అంటున్నారు. కథ, కథనం మీద బోయపాటి శ్రద్ద పెట్టలేదని.. కేవలం ఫైట్స్ మీదే శ్రద్ద పెట్టడం వలన రామ్ చరణ్ కి ఇలాంటి పరిస్థితి వచ్చిందని అంటున్నారు. 

ఏ రకంగానూ ఫ్యామిలీ ఆడియన్స్ ని, క్లాస్ ఆడియన్స్ ని వినయ విధేయ రామ ఆకట్టుకోదని.. కేవలం మాస్ అండ్ బిసి సెంటర్స్ ఆడియన్స్ కి మాత్రమే ఈ సినిమా అంటూ అందరూ పెదవి విరుస్తున్నారు. బోయపాటి మాస్ డైరెక్టర్ అయినా.. ఎప్పుడూ కథను నెగ్లెట్ చెయ్యలేదని…. కానీ వినయ విధేయ రామలో కథ మైనస్ అవడం బ్యాడ్ స్క్రీన్ ప్లేకి తోడు, దేవిశ్రీ మ్యూజిక్ ఆకట్టుకోలేదని… ఇంకా ఎడిటింగ్ వీక్ గా ఉందని స్టార్ క్యాస్ట్ ని బోయపాటి సరిగ్గా వాడుకోలేకపోయాడని… అందరూ చెబుతున్న మాట. కేవలం రామ్ చరణ్ యాక్షన్ లుక్, టాటూ బాడీ లుక్ ఆకట్టుకునేలా ఉండడం.. చరణ్ డాన్స్ లు బావున్నాయంటున్నారు.

మరి సినిమా కేవలం మాస్ ఆడియన్స్ కోసమే తీసినట్టుగా ఉండడం.. రామ్ చరణ్ రంగస్థలంతో బ్లాక్ బస్టర్ హిట్ అందుకుంటే… ఆ స్థాయి అంచనాలతో విడుదలైన వినయ విధేయ రామ ఏమాత్రం రంగస్థలం అంచనాలను అందుకోలేకపోయింది. మరి మాస్ ప్రేక్షకులు తలచుకున్నా వినయ విధేయకు కలెక్షన్స్ రావడం కష్టమంటున్నారు. ఎందుకంటే… రామ్ చరణ్ సంక్రాంతి పండక్కి చాలా గట్టి పోటీతోనే బరిలో దిగాడు. ఒక పక్క ఎన్టీఆర్ బయోపిక్ కథానాయకుడు, మరోవైపు ఎఫ్ టు కామెడీ ఎంటర్ టైనర్ మధ్యలో ఉండడం…. ప్రేక్షకులు ఈ సంక్రాంతికి కోడి పందేలు.. సంక్రాంతి సంబరాలు అంటూ ఎవరి హడావిడిలో వారు ఉండడంతో.. రామ్ చరణ్ వినయ విధేయ రామకి మాస్ కలెక్షన్స్ కూడా అనుమానమే అంటున్నారు.


వెంకీ అదరగొట్టాడు… కానీ..?

Category : Uncategorized

సంక్రాంతి పండుగకు రావాల్సిన చిత్రాన్ని వచ్చేశాయి. కొత్తదనం, ఏదో ఎన్టీఆర్‌ జీవిత చరిత్ర తెలుసుకోవాలని భావించే ప్రేక్షకులకు ఎన్టీఆర్‌ బయోపిక్‌ మొదటి పార్ట్‌గా వచ్చిన కథానాయకుడు మంచి ఛాయిస్‌ అనిపించుకుంది. అయితే కలెక్షన్లు మాత్రం అనుకున్న స్థాయిలో లేవు. ఎందుకంటే ఎన్టీఆర్‌ జీవితంలోని ఎమోషన్స్‌ని చూపించడంలో విఫలం కావడం, కథలో ప్రేక్షకులకు తెలియని ఎన్టీఆర్‌ జీవితంలోని కోణాలను చూపించకపోవడం, సినిమా అంతా పాజిటివ్‌గానేఉండాలి… ఎవరిని నెగటివ్‌గా చూపించరావు..

ఈ చిత్రం చూసిన వారు ఎన్టీఆర్‌ని పాజిటివ్‌ వ్యూలో చూసిన ఫీల్‌తోనే థియేటర్ల బయటకు వెళ్లాలనే ఉద్దేశ్యంతో ఎన్టీఆర్‌ జీవితంలోని ఎన్నో కీలక ఘట్టాలను వదిలేయడం వల్ల ఎమోషన్స్‌ మిస్‌ అయ్యాయి. సినిమా సాగతీతగా, ఏదో రీమిక్స్‌ సాంగ్స్‌ని చూసిన ఫీల్‌ని కలిగించింది. ఇక వినయ విధేయ రామ, పేట చిత్రాలు పూర్తి మాస్‌ మసాలా, యాక్షన్‌ తరహాలో పెద్దగా ఆకట్టుకోవడం లేదు. చివరగా వచ్చిన దిల్‌రాజు-అనిల్‌రావిపూడి-వెంకటేష్‌-వరుణ్‌తేజ్‌ల ఎఫ్‌2 చిత్రం సంక్రాంతి పండుగకు ఫ్యామిలీ ప్రేక్షకులు చూడాలని ఇష్టపడే కామెడీ ఎంటర్‌టైనర్‌గా పాజిటివ్‌ టాక్‌ని తెచ్చుకుంది.

ఇది దిల్‌రాజుకి ఎంతో ఊరడింపు అనే చెప్పాలి. గత కొంతకాలంగా దిల్‌రాజు పరిస్థితి బాగా లేదు. ఏదీ కలిసి రావడం లేదు. అయినా ఆయనకు సంక్రాంతి మాత్రం బాగానే అచ్చివచ్చింది. సీతమ్మ వాకిట్లోసిరిమల్లెచెట్టు, శతమానం భవతి వంటి చిత్రాలతో ఆయన సంక్రాంతికి కొన్ని సెలైంట్‌ కిల్లర్స్‌ని అందించాడు. ఈ ఏడాది కూడా ఎఫ్‌2తో ఆయన అదే పనిచేశాడు. ఇక ఈ చిత్రాన్ని మొత్తం వెంకీ తన నటనతో వన్‌మ్యాన్‌షో అనిపించి, నడిపించాడు. ఆయన కామెడీ టైమింగ్‌ చూస్తేఎప్పుడో వచ్చిన నువ్వు నాకు నచ్చావ్‌, మల్లీశ్వరి వంటి చిత్రాలు మరలా మన కళ్ల ముందు మెదులాడుతాయి. దాంతో మనకి చాలా కాలం తర్వాత పాత వెంకీ కనిపించాడు. 

అన్నపూర్ణ, వై.విజయ, వరుణ్‌తేజ్‌, మెహ్రీన్‌ వంటి సీనియర్‌, యంగ్‌ ఆర్టిస్టులను ఆయన డామినేట్‌ చేశాడు. కంటెంట్‌ పెద్దగా లేకపోయినా హాస్య సన్నివేశాలు, సంభాషణలతో చిత్రాన్ని రక్తి కట్టించాడు. ఇక సెకండ్‌ హాఫ్‌పై మాత్రం కాస్త నెగటివ్‌ టాక్‌ వచ్చింది. గంటకు పైగా ప్రకాష్‌రాజ్‌ ఇంట్లోనే కథను నడపడం వల్ల సాగతీత అనిపించింది. కుక్కను లోబరుచుకునే సీన్‌లో తోడల్లుడు వరుణ్‌తేజ్‌ భవిష్యత్తుని ఊహించుకోవడం, వరుణ్‌ని హెచ్చరించడం, లేట్‌ వయసులో పెళ్లి కాని ప్రసాద్‌ తరహా పాత్రలో ఆయన నటన బాగా మెప్పించింది. 

ఇక అనిల్‌రావిపూడి పూర్తి స్క్రిప్ట్‌తో సినిమా షూటింగ్‌ చేయలేదని వచ్చిన వార్తలకు వెంకీ కూడా అది నిజమేననే విధానంలో సమాధానం చెప్పడం చూస్తే అది నిజమేనని అనిపిస్తుంది. అనిల్‌రావిపూడి, దిల్‌రాజు వంటి వారు కూడా పూర్తి స్క్రిప్ట్‌తో షూటింగ్‌కి ఎంటర్‌ కాకపోవడం మాత్రం సరైన పద్దతి కాదనే చెప్పాలి. మొత్తానికి ఈ సంక్రాంతికి కథానాయకుడు, ఎఫ్‌2లలో ఏది విజేతగా నిలుస్తుందో వేచిచూడాల్సివుంది…! 


చివరి షెడ్యూల్లో నిఖిల్ ముద్ర.. త్వ‌ర‌లో టీజ‌ర్

Category : Uncategorized

యంగ్ హీరో నిఖిల్ సిద్దార్థ్, లావ‌ణ్య త్రిపాఠి జంట‌గా తెర‌కెక్కుతున్న యాక్ష‌న్ ఎంట‌ర్ టైన‌ర్ ముద్ర‌. ఈ చిత్రాన్ని టిఎన్ సంతోష్ తెర‌కెక్కిస్తున్నారు. వాస్త‌విక సంఘ‌ట‌నల ఆధారంగా జ‌ర్న‌లిజం నేప‌థ్యంలో తెర‌కెక్కుతున్న సినిమా ఇది. ముద్ర షూటింగ్ చివ‌రిద‌శ‌లో ఉంది. ఐదు రోజుల టాకీ.. ఓ పాట ఈ నెల‌లో పూర్తి చేయ‌నున్నారు. డ‌బ్బింగ్ వ‌ర్క్స్, పోస్ట్ ప్రొడ‌క్ష‌న్ ప‌నులు ఒకేసారి పూర్తి చేస్తున్నారు చిత్ర‌యూనిట్. అద్భుత‌మైన ఔట్ పుట్ ఇవ్వ‌డానికి చాలా జాగ్ర‌త్త‌లు తీసుకుంటున్నారు ద‌ర్శ‌క నిర్మాత‌లు. ఈ చిత్రంలో గ్రాఫిక్స్ వ‌ర్క్స్ కూడా ఉన్నాయి.. దాంతో పాటు భారీ యాక్ష‌న్ సీక్వెన్సులు ఉన్నాయి.. అందుకే కాస్త స‌మ‌యం ఎక్కువ‌గా తీసుకుంటున్నారు యూనిట్. ఇందులో జ‌ర్న‌లిస్ట్ పాత్ర‌లో న‌టిస్తున్నారు నిఖిల్.. ఫ‌స్ట్ లుక్ కు కూడా అద్భుత‌మైన రెస్పాన్స్ వ‌చ్చింది. టీజ‌ర్ త్వ‌ర‌లోనే విడుద‌ల కానుంది. స్యామ్ సిఎస్ ఈ చిత్రానికి సంగీతం అందిస్తున్నారు. వెన్నెల కిషోర్, పోసాని కృష్ణ‌ముర‌ళి, నాగినీడు, ప్ర‌గ‌తి, స‌త్య‌, త‌రుణ్ అరోరా, రాజా ర‌వీంద్ర ఈ చిత్రంలో స‌హాయ పాత్ర‌ల్లో న‌టిస్తున్నారు. ఔరా సినిమాస్ పివిటి, మూవీ డైన‌మిక్స్ ఎల్ఎల్పి బ్యాన‌ర్స్ పై కావ్య వేణుగోపాల్, రాజు కుమార్ నిర్మిస్తున్నారు. బి మ‌ధు ఈ చిత్రాన్ని స‌మ‌ర్పిస్తున్నారు. 

న‌టీన‌టులు: 

నిఖిల్ సిద్ధార్థ్, లావ‌ణ్య త్రిపాఠి, వెన్నెల కిషోర్, పోసాని కృష్ణ‌ముర‌ళి, ప్ర‌గ‌తి, స‌త్య‌, త‌రుణ్ అరోరా, రాజా ర‌వీంద్ర, నాగినీడు..


కాసేపు కనబడినా చాలనే ఆ పాత్రలు చేశారా?

Category : Uncategorized

సూపర్‌స్టార్ రజినీకాంత్ పక్కన హీరోయిన్ గా ఛాన్స్ వస్తే ఏ హీరోయిన్ కూడా వదులుకోదు. ఆయన పక్కన నటించాలంటే పెట్టిపుట్టాలనట్టుగా ఉంటుంది హీరోయిన్స్ వ్యవహారం. రజినీకాంత్ పక్కన ఛాన్స్ వచ్చింది అంటే ఆ హీరోయిన్ కి పండగే. అయితే కొన్నాళ్లుగా రజినీకాంత్ పక్కన వయసున్న హీరోయిన్స్ నటిస్తున్నారు. కాలా కానివ్వండి కబాలీలో కానివ్వండి కాస్త వయసు మీరిన హీరోయిన్స్ రజిని పక్కన నటించారు. తాజాగా పెట్టాలో మొదటిసారి రజినీకాంత్ పక్కన సిమ్రాన్ అండ్ త్రిషలు ఛాన్స్ దక్కించుకున్నారు. ఇక పేటలో రజిని సరసన ఛాన్స్ వచ్చినందుకు గాను త్రిష తెగ ఆనందపడిపోయింది. తన సంతోషాన్ని సోషల్ మీడియా ద్వారా అభిమానులతో పంచుకుంది. ఇక రజినీకాంత్ – త్రిషల పేట పోస్టర్స్ ఆకట్టుకునేలా ఉండడం.. పేట ట్రైలర్ లో త్రిష ట్రెడిషనల్ లుక్ చూసిన వారు పేట లో త్రిష రోల్ మీద అంచనాలు పెంచుకున్నారు.

కానీ సినిమాలో చూసేసరికి త్రిష కేరెక్టర్ కి అస్సలు ప్రాధాన్యత లేదు. రజినీకాంత్ భార్యగా త్రిష ట్రెడిషనల్ గా ఆకట్టుకుంది. ఇక పేట ట్రైలర్‌లో చాలా చిన్న సీన్‌లో కనబడినట్లుగానే పేట సినిమాలో త్రిష కేరెక్టర్ ని కార్తీక్ సుబ్బరాజు డిజైన్ చేసాడు. అసలు ఫస్ట్ హాఫ్‌లో త్రిష కనబడదు. అయితే ఫస్ట్ హాఫ్ లో లేని త్రిష సెకండ్ హాఫ్ లో బలంగా కనిపిస్తుందేమోలే అనుకున్న ప్రేక్షకుడికి నిరాశే కలుగుతుంది. మరో హీరోయిన్ సిమ్ర‌ాన్‌ కి రజినీకి లవ్ ట్రాక్ పర్వాలేదనిపిస్తుంది. కానీ సిమ్రాన్ కేరెక్టర్ ని కూడా దర్శకుడు సరిగ్గా తీర్చి దిద్దలేకపోయాడు. 

అసలు సిమ్రాన్, త్రిష‌.. ఇద్ద‌రి ట్రాకులూ వేస్టే. అస‌లు వీరిద్ద‌రినీ దర్శకుడు ఎందుకు తీసుకున్నాడో అర్థం కాదు. ఏదో హీరోయిన్స్ ఉంటేనే ప్రేక్షకుడు మెచ్చుతాడు అన్నట్టుగా ఉంది.. పేటలో హీరోయిన్స్ పరిస్థితి. ఇక త్రిష‌ ఒక‌టో రెండో డైలాగులు‌తో సరిపెట్టుకోవాల్సి వచ్చింది. మరి ఇంత దానికి త్రిష ఎందుకు అంత ఇదైపోయిందో ఆమెకే తెలియాలి. ఏదో రజిని సినిమాలో కాసేపు కనబడినా చాలు అన్నట్టు ఉంది త్రిష కేరెక్టర్ పెట్టాలో.


ఆ విషయంలో ‘కథానాయకుడు’ ఫెయిల్..!!

Category : Uncategorized

నాడు ఎన్టీఆర్‌ కెరీర్‌ని ప్రారంభం నుంచి చూసిన వారు మరీ ఎక్కువగా లేకపోయినా కొందరు ఉన్నారు. కానీ వారి సలహాలను ‘కథానాయకుడు’టీం తీసుకోలేదా? అనే అనుమానం వస్తోంది. బయోపిక్‌ అంటే అందులో రెండు కోణాలు ఉండాలి. కానీ అంతా మంచే చూపిస్తాం. చెడుగా చూపించాల్సినవి అసలు చూపించం.. ఎవ్వరినీ చెడ్డగా చూపే ఉద్దేశ్యం లేదు అంటే దానికి బయోపిక్‌ అని చెప్పాల్సిన పనిలేదు. ఎందుకంటే ఎన్టీఆర్‌ జీవితంలోకి లక్ష్మీపార్వతి వచ్చిన తర్వాత ఏయే సంఘటనలు, పరిణామాలు జరిగాయి? అనే కోణంలో తాను ‘లక్ష్మీస్‌ ఎన్టీఆర్‌’ని తీస్తున్నానని వర్మ చెప్పాడు. బహుశా ఆయన లక్ష్మీపార్వతి మంచిగా చూపిస్తూ, ఎన్టీఆర్‌ కుటుంబ సభ్యులను, చంద్రబాబు నాయుడుని నెగటివ్‌గా చూపించే అవకాశం ఉంది. అదే సమయంలో అసలు చూపించం అని కాకుండా బాలయ్య, చంద్రబాబుల కోణంలోనైనా నిజమని వారికి అనిపించిన వాస్తవాలను చూపిస్తే క్రిష్‌ సక్సెస్‌ అయ్యేవాడు. 

మరోవైపు ఈ చిత్రం సాగతీతగా అనిపించిందని, రెండు పార్ట్‌లను ఒకే మూవీలో చూపించి రేసీగా స్క్రీన్‌ప్లే నడిపించి ఉంటే బాగుండేదని కూడా వాదన వినిపిస్తోంది. తేజ ఈ అనవసర గెటప్పులు, పాటల బిట్స్‌ వల్లనే సినిమాని వదిలేశాడని ప్రచారం జరుగుతోంది. అదే నిజమైతే తేజ అనుకున్నదే నేడు వాస్తవంలో నిజంగా మారింది. ఈ గెటప్‌లు, పాత పాటల కోసం ఎవ్వరూ సినిమా చూడరనే పాయింట్‌ని యూనిట్‌ మరిచింది. ఇక ఎన్టీఆర్‌ బాల్యం, పడిన కష్టాలు, నాటకాలలో ఆయనకున్న అనుభవం సినిమాకి ఎలా ఉపయోగపడింది? ‘పాతాళభైరవి’ ముందు ఇంటి నుంచి తెచ్చిన డబ్బులు అయిపోతే మరలా ఇంట్లో వారిని డబ్బులు అడగకూడదని భావించి ఎన్టీఆర్‌ పస్తులు ఉన్న దినాలు, నాటి ఫ్లాప్‌లు, స్టార్‌గా ఎదగడానికి ఆయన పడిన కష్టాలు, చంద్రబాబుతో పరిచయం, తన అల్లుడిని చేసుకున్న విధానం, మద్రాస్‌ నుంచి సినీ పరిశ్రమను హైదరాబాద్‌కి తీసుకొచ్చిన ఘటన, ముఖ్యమంత్రి అయిన తర్వాత ఇండస్ట్రీకి ఎన్నో చేస్తానని చెప్పి ఏమీ చేయలేదని ఆయన మీద వ్యంగ్యంగా పలువురు మరీ ముఖ్యంగా కృష్ణ తీసిన చిత్రాలు, అందులో తన పాత్రలో నటించిన కోటశ్రీనివాసరావుని ఎన్టీఆర్‌ అభినందించడం, తన ప్రతి స్క్రిప్ట్‌ ఎంతో మంచి క్రిటిక్‌గా ఎన్టీఆర్‌ భావించి తన భార్య బసవతారకంకు వినిపించిన విషయం… వంటి పలు అంశాలు ఇందులో లేవు. 

వీటిని తాజాగా ఎన్టీఆర్‌ సమకాలీనుడైన ఫిల్మ్‌జర్నలిస్ట్‌ గుడిపూడి శ్రీహరి బయటపెట్టాడు. ఇక ‘దానవీరశూరకర్ణ’లో ఎక్కువ పాత్రలను పోషించిన ఘనత ఎన్టీఆర్‌దే అన్నట్లు చూపారు. కానీ అంతకు ముందే ఏయన్నార్‌ ‘నవరాత్రి’ చిత్రంలో ఏకంగా 9 పాత్రలు పోషించాడు. అంజలి, భానుమతి, ‘గుండమ్మకథ’ సమయంలో సూర్యకాంతం వంటి వారి ప్రస్తావన లేకపోవడం… ఇలా ఎన్నో విషయాలను విస్మరించడం వల్ల ‘కథానాయకుడు’ పూర్తి విందు వంటి చిత్రాన్ని అందించలేకపోయిందనేది వాస్తవం. 


సినీజోష్ రివ్యూ: ఎఫ్2

Category : Uncategorized

శ్రీ వెంకటేశ్వర క్రియేషన్స్

ఎఫ్2

తారాగణం: వెంకటేష్, వరుణ్‌తేజ్, తమన్నా, మెహరీన్, రాజేంద్రప్రసాద్, ప్రకాష్‌రాజ్, రఘుబాబు, నాజర్, సత్యం రాజేష్, వెన్నెల కిషోర్, ప్రియదర్శి, శ్రీనివాసరెడ్డి, సుబ్బరాజు, బ్రహ్మాజీ, అనసూయ, ఝాన్సీ, పృథ్వీ, ప్రదీప్, వై.విజయ, అన్నపూర్ణ తదితరులు

సినిమాటోగ్రఫీ: సమీర్‌రెడ్డి

ఎడిటింగ్: తమ్మిరాజు

సంగీతం: దేవిశ్రీప్రసాద్

కథా సహకారం: ఎస్.కృష్ణ

సమర్పణ: దిల్‌రాజు

నిర్మాతలు: శిరీష్, లక్ష్మణ్

రచన, దర్శకత్వం: అనిల్ రావిపూడి

విడుదల తేదీ: 12.01.2019

నవరసాల్లో ప్రధానంగా అందర్నీ ఆకట్టుకునేది హాస్యరసం. దాన్ని సరైన పద్ధతిలో తీసుకుంటే ఆరోగ్యానికి చాలా మంచిది. హాస్యరసాన్ని పండించడం, అందర్నీ నవ్వించడం అనేది ఎంతో కష్టంతో కూడుకున్న పని. యాక్షన్, సెంటిమెంట్, లవ్… ఇలాంటి సినిమాలు కాస్త విషయం ఉన్న దర్శకుడు ఎవరైనా తియ్యగలరు. కానీ, కామెడీ ప్రదానంగా సినిమాలను తీసి మెప్పించడం అనేది కొందరికే సాధ్యమవుతుంది. ఇప్పుడున్న డైరెక్టర్లలో అలాంటి విషయం ఉన్న దర్శకుడు అనిల్ రావిపూడి. కథ ఏదైనా అందులో సరైన పాళ్ళలో కామెడీని కూడా మిక్స్ చేసి నవ్వించడంలో తనకంటూ ఓ ప్రత్యేకతను ఏర్పరుచుకున్నాడు. పటాస్, సుప్రీమ్, రాజా ది గ్రేట్.. ఇలా తను చేసిన సినిమాల్లో కామెడీకి పెద్ద పీట వేసిన అనిల్ సంక్రాంతి పండగ సందర్భంగా శనివారం విడుదలైన ఎఫ్2(ఫన్ అండ్ ఫ్రస్ట్రేషన్) చిత్రంలోనూ అదే ఫార్ములాను ఉపయోగించాడు. మొదటిసారి భార్యాభర్తలకు సంబంధించిన ఒక సున్నితమైన పాయింట్‌ని తీసుకొని దాని చుట్టూ కథ అల్లుకున్నాడు. ప్రస్తుత సమాజంలో భార్యాభర్తల మధ్య అనుబంధం ఎలా ఉంది? ఒకరి మీద మరొకరి డామినేషన్ ఏ రేంజ్‌లో ఉంటుందనేది ప్రస్తావిస్తూనే దానికి సొల్యూషన్ కూడా చెప్పాడు. 

ఇది రెండు జంటల కథ. వెంకీ(వెంకటేష్), హారిక(తమన్నా) పెళ్ళి చేసుకుంటారు. ఆరు నెలలు సజావుగా సాగిపోయిన వారి సంసారంలో సహజంగానే చిన్న చిన్న అపార్థాలు, మనస్పర్థలు చోటు చేసుకుంటాయి. దాంతో నువ్వు మారిపోయావు అంటే నువ్వు మారిపోయావు అంటూ ఒకరిపై ఒకరు నిందలు వేసుకుంటూ ఉంటారు. అయితే ఎక్కువ నలిగిపోయేది భర్తే కాబట్టి వెంకీ కూడా ఫ్రస్ట్రేషన్‌లోనే ఉంటాడు. దాని నుంచి బయటపడేందుకు వెంకీ ఆసన్ అంటూ ఓ కొత్త ఆసనాన్ని కనిపెడతాడు. ఇదిలా ఉండగా హారిక చెల్లెలు హనీ(మెహరీన్) వరుణ్(వరుణ్‌తేజ్)ని ప్రేమిస్తుంది. పెద్దల అంగీకారంతో ఇద్దరికీ నిశ్చితార్థం జరుగుతుంది. అయితే పెళ్ళి కాకుండానే హనీ వల్ల టార్చర్‌కి గురవుతుంటాడు వరుణ్. ఒకరు భార్యతో, ఒకరు కాబోయే భార్యతో నానా ఇబ్బందులు పడుతున్న వెంకీ, వరుణ్ ఒకచోట చేరతారు. వారికి సపోర్ట్‌గా ఎదురింట్లో ఉండే రాజేంద్రపసాద్ ఉంటాడు. వరుణ్, హనీల పెళ్ళి జరగబోతుండగా ఈ ముగ్గురూ యూరప్ చెక్కేస్తారు. అప్పుడు హారిక, హనీ రియాక్షన్ ఏమిటి? యూరప్ వెళ్ళిన వెంకీ, వరుణ్ తమ ఫ్రస్ట్రేషన్ నుంచి బయటపడడానికి ఏం చేశారు? వెంకీ, హారిక కలుసుకున్నారా? వరుణ్, హనీ పెళ్ళి జరిగిందా? అనేది మిగతా కథ. 

హీరోల్లో సీనియర్ హీరోల్లో వెంకటేష్‌కి ఉన్న కామెడీ టైమింగ్ మరే హీరోకీ లేదనడంలో ఎలాంటి అతిశయోక్తి లేదు. కామెడీకి స్కోప్ ఉన్న క్యారెక్టర్ ఇవ్వాలేగానీ ప్రేక్షకులకు కావాల్సినంత వినోదాన్ని పంచుతాడు. ఈ సినిమాలో కూడా అదే జరిగింది. వెంకీ క్యారెక్టర్‌కి వెంకటేష్ హండ్రెడ్ పర్సెంట్ న్యాయం చేశాడు. చాలా ఏళ్ళ క్రితం వచ్చిన నువ్వు నాకు నచ్చావ్, మల్లీశ్వరి వంటి సినిమాల్లో అల్టిమేట్ కామెడీ చేసిన వెంకటేష్‌కి మళ్ళీ ఓ మంచి క్యారెక్టర్ చేసే ఛాన్స్ వచ్చింది. దాన్ని నూటికి నూరుపాళ్ళు వాడుకున్నాడు వెంకటేష్. ఆడియన్స్‌ని కడుపుబ్బ నవ్వించాడు. వరుణ్ పాత్రలో వరుణ్‌తేజ్ కొత్తగా కనిపించాడు. తెలంగాణ స్లాంగ్‌లో డైలాగ్స్ చెప్పి ఆకట్టుకునే ప్రయత్నం చేశాడు. హీరోయిన్లు తమన్నా, మెహరీన్ క్యారెక్టర్స్‌కి కూడా సినిమాలో ఎక్కువ ప్రాధాన్యం ఉంది. దానికి తగ్గట్టుగానే ఇద్దరూ తమ క్యారెక్టర్లకు న్యాయం చేశారు. పృథ్వీ, ఝాన్సీ, ప్రియదర్శి, రఘుబాబు, ప్రదీప్, వై.విజయ, అన్నపూర్ణ తమదైన టైమింగ్‌తో ఆకట్టుకున్నారు. 

సాంకేతిక విభాల గురించి చెప్పాలంటే ముఖ్యంగా సమీర్‌రెడ్డి ఫోటోగ్రఫీ గురించి చెప్పాలి. ప్రతి సీన్‌నీ ఎంతో రిచ్‌గా,బ్రైట్‌గా చూపించడంలో సక్సెస్ అయ్యాడు. అనిల్ రావిపూడి చేసిన గత మూడు సినిమాలకు సాయికార్తీక్ సంగీతం అందించగా ఈ నాలుగో సినిమాకి మాత్రం దేవిశ్రీప్రసాద్ సంగీత సమకూర్చాడు. అయితే సినిమాలో ఒక్క పాట కూడా ఆకట్టుకునేలా లేదు. దానికి తగ్గట్టుగానే బ్యాక్‌గ్రౌండ్ స్కోర్ కూడా బాగా లేదు. ఎడిటింగ్ విషయానికి వస్తే ఫస్ట్‌హాఫ్ అంతా నాన్ స్టాప్ కామెడీతో రన్ అవుతుంది. సెకంఫ్‌కి వచ్చే సరికి ల్యాగ్ ఎక్కువైంది. అక్కడక్కడ కొన్ని సీన్స్ తీసేసి ఉంటే కొంత బోర్ పార్ట్ తగ్గేది. వెంకటేశ్వర క్రియేషన్స్ ప్రొడక్షన్ వేల్యూస్ బాగున్నాయి. ఇక దర్శకుడు అనిల్ రావిపూడి గురించి చెప్పాలంటే.. వరస సక్సెస్‌లను అందిస్తున్న అనిల్‌కి ఇది మరో విజయంగా చెప్పవచ్చు. భార్యాభర్తల్లో ఎవరూ తక్కువ కాదని, భార్య వల్ల భర్త సంతోషంగా ఉంటే అతను సారీ చెప్పాలని, భర్త వల్ల భార్య బాధపడినపుడు భర్తే సారీ చెప్పాలని… ఇలా చేస్తే సంసారం సుఖమయం అవుతుందనేది ఈ సినిమాలో చెప్పాడు. తన సినిమాల్లో టన్నుల కొద్దీ కామెడీని నింపేసే అనిల్ ఎఫ్2 విషయంలోనూ అదే చేశాడు. సినిమా స్టార్ట్ అయిన దగ్గర్నుంచి ఫస్ట్‌హాఫ్ కంప్లీట్ అయ్యే వరకు నాన్‌స్టాప్‌గా నవ్విస్తూనే ఉన్నాడు. ఒక్కో క్యారెక్టర్‌కి ఒక్కో మేనరిజం పెట్టి వీలైనంత ఎక్కువగా నవ్వించే ప్రయత్నం చేశాడు. నటుడు ప్రదీప్ చెప్పే అంతేగా అంతేగా అనే డైలాగ్ బాగా పాపులర్ అవుతుంది. ఫస్ట్‌హాఫ్‌లో విపరీతంగా నవ్వించిన అనిల్ సెకండాఫ్‌కి వచ్చేసరికి ఆ కామెడీ అంతా మిస్ అయింది. కొన్ని అనవసరమైన సీన్స్‌తో సెకండాఫ్ కాస్త బోర్ ఫీలవుతారు ఆడియన్స్. సెకండాఫ్‌లో భార్యలను, భర్తలను కన్విన్స్ చేసేందుకు రాసుకున్న సీన్స్ వల్ల అప్పటివరకు నవ్వుకున్న ఆడియన్స్‌కి ఒక్కసారిగా ఏదో వెలితి ఉన్న ఫీలింగ్ కలుగుతుంది. ఫైనల్‌గా చెప్పాలంటే.. ఈ పండగ సీజన్‌లో ఫ్యామిలీ ఆడియన్స్‌ని థియేటర్స్ రప్పించే సినిమా ఇది. కుటుంబ సమేతంగా చూసి ఎంజాయ్ చేసే సినిమా. 

ఫినిషింగ్ టచ్: ఇదే పండగ సినిమా.. అంతేగా!